निर्भीडसत्ता न्यूज –
पिंपरी-चिंचवड महापालिकेतील भाजपचा दुसर्या महापौराचे नाव आज मंगळवार (दि. 31) निश्चित होणार आहे. महापौर नितीन काळजे व उपमहापौर शैलजा मोरे यांनी आपल्या पदाचा राजीनामा मंगळवारी (दि.24) दिला. या रिक्त झालेल्या पदासाठी मंगळवारी अर्ज स्वीकारले जाणार आहेत. सत्ताधारी भाजपचा दुसरा नगरसेवक या महापौरपदाच्या खुर्चीवर विराजमान होणार आहे. त्यामुळे भाजपच्या दुसऱ्या महापौरपदी नाव निवड निश्चित होणार आहे.
महापालिकेत सत्ताधारी भारतीय जनता पक्षात महापौर पदासाठी अनेक जण इच्छुक आहेत. महापौरपदासाठी रविवारी एका गटाने मुंबईत मुख्यमंत्री देवेंद्र फडणवीस यांचीही भेट घेतली आहे. महापौरपदासाठी माळी, ओबीसी व लेवा पाटीदार संघटनांनी स्वतंत्रपणे पत्रकार परिषद घेऊन त्या वर्गातील नगरसेवकास संधी देण्याची मागणी केली आहे. आता महापौरपदाची माळ कोणाच्या गळ्यात पडणार यांची उत्सुकता शिगेला पोहचली आहे.
भाजपचा दुसरा महापौर कोण होणार? याची उत्सुकता भाजपच्या नगरसेवक आणि शहरवासियांमध्ये वाढली आहे. महापालिकेत सर्वांत आघाडीवर नामदेव ढाके आणि शीतल शिंदे यांच्या नावाची आतून चर्चा असून, त्यापाठोपाठ शत्रुघ्न काटे, संतोष लोंढे यांची नावे चर्चेत आहेत. मात्र भाजपच्या धोरणानुसार ऐनवेळी दुसऱ्याच कोणाचे तरी नाव जाहीर होत असल्याचे एकीकडे बोलले जात आहे.
दुपारी तीनपासून उमेदवारी अर्ज स्वीकारणार
महापौर व उपमहापौरपदासाठी आज मंगळवार दि. (३१) दुपारी 3 ते सायंकाळी 5 या वेळेत उमेदवारी अर्ज (नामनिर्देशन पत्र) स्वीकारले जाणार आहेत. महापालिकेच्या नगरसचिव उल्हास जगताप यांच्या दालनात हे अर्ज दाखल केले जातील. या दोन्ही पदांसाठी प्रत्येकी एकाचाच अर्ज दाखल झाला, तर दोघांचीही निवड बिनविरोध निश्चित होईल. त्यांच्या निवडीची अधिकृत घोषणा शनिवारी (दि.4) विशेष सर्वसाधारण सभेत सकाळी अकरा वाजता होईल.या निवडणुकीसाठी पीएमपीएलच्या अध्यक्षा नयना गुंडे यांच्या अध्यक्षतेखाली हि विशेष सभा होणार आहे.