गतवर्षी नोव्हेंबरमध्ये बॉलिवूड अभिनेत्री सुष्मिता सेनने इन्स्टाग्रामवर फोटो पोस्ट करत मॉडेल रोहमन शॉलला डेट करत असल्याचं सांगितलं. तेव्हापासून सुष्मिताच्या सोशल मीडिया अकाऊंटवर रोहमनसोबतचे बरेच फोटो पाहायला मिळतात. सुष्मिताच्या कौटुंबिक कार्यक्रमांमध्येही रोहमन सहभागी होतो. आता दोघांनीही हे नातं पुढच्या टप्प्यावर नेण्याचा निर्णय घेतला आहे. सुष्मिता व रोहमन या वर्षाअखेर म्हणजेच नोव्हेंबर किंवा डिसेंबर महिन्यात विवाहबंधनात अडकणार असल्याचं वृत्त आहे.
इन्स्टाग्रामवरून रोहमन आणि सुष्मिताची प्रेमकहाणी सुरू झाली. ‘त्याने मला इन्स्टाग्रामवर डायरेक्ट मेसेज पाठवला होता. पण इन्स्टाग्रामवरील मेसेज मी कधीच वाचत नाही. त्यामुळे त्या सर्व न वाचलेल्या मेसेजेसमध्ये त्याचासुद्धा एक मेसेज होता. एकदा मुलीसोबत काहीतरी बोलत असताना अचानक डायरेक्ट मेसेजवर क्लिक झालं. रोहमनचा मेसेज मला इतका आवडला की मी लगेच त्याला रिप्लाय दिला,’ असं सुष्मिताने एका मुलाखतीत सांगितलं होतं. तेव्हापासूनच मेसेजचा सिलसिला सुरू झाला. त्यानंतर रोहमनने सुष्मिताला त्याचा फुटबॉल मॅच पाहण्यासाठी बोलावलं. ही त्यांची पहिली भेट होती. नंतर सुष्मिताने रोहमनला कॉफीचे आमंत्रण दिले.