पिंपरी । निर्भीडसत्ता न्यूज
‘कटिबद्धा जनहिताय’ हे ब्रीदवाक्य सार्थ करणाऱ्या पिंपरी चिंचवड महानगरपालिकेचा ४१ वा वर्धापन दिन ११ ऑक्टोबर रोजी साजरा करण्यात येणार असून यानिमित्ताने महापालिकेच्या वतीने विविध कार्यक्रमांचे आयोजन करण्यात आले आहे.
पिंपरी येथील महापालिकेच्या मुख्य प्रशासकीय इमारतीच्या प्रांगणामध्ये नगरीचे शिल्पकार दिवंगत अण्णासाहेब मगर यांच्या पूर्णाकृती पुतळ्यास आयुक्त तथा प्रशासक शेखर सिंह यांच्या हस्ते सकाळी १० वाजता पुष्पहार अर्पण करून तसेच अभिवादन करून विविध कार्यक्रमांस सुरूवात करण्यात येणार आहे.
त्यानंतर सकाळी १० वाजून १० मिनीटांनी महापालिकेच्या पिंपरी येथील महापालिकेच्या मुख्य प्रशासकीय इमारतीच्या प्रांगणामध्ये रक्तदान शिबीराचे आयोजन करण्यात येणार आहे. याव्यतिरिक्त संगीत खुर्ची, रस्सी खेच अशा विविध स्पर्धांचे आयोजन देखील कर्मचाऱ्यांसाठी करण्यात आले आहे.
सकाळी ११ वाजता न्यू होम मिनिस्टर अर्थात खेळ पैठणीचा हा खास महिलांसाठी कार्यक्रम आयोजित करण्यात आला आहे.
महापालिका कर्मचाऱ्यांसाठी माझी माती माझा देश, मेरा भारत महान तसेच ठिपक्यांची रांगोळी स्पर्धा, गोड व तिखट पदार्थांची पाककला स्पर्धा, फॅन्सी ड्रेस अर्थात वेशभूषा स्पर्धेचेही आयोजन करण्यात आले आहे.
२०२२-२३ या वर्षातील उत्कृष्ट काम करणारे अधिकारी, कर्मचारी तसेच रांगोळी, पाककला व वेशभूषा स्पर्धेतील विजेत्यांचा सत्कार समारंभही दुपारी २ वाजता पिंपरी येथील मुख्य प्रशासकीय इमारतीमध्ये पार पडणार असून त्यांनंतर दुपारी ३ वाजता प्रा. रामकृष्ण मोरे प्रेक्षागृह, चिंचवड येथे महापालिकेतील अधिकारी कर्मचारी सहभागी होऊन ऑर्केस्ट्रा सादर करणार आहेत, अशी माहिती महापालिकेच्या वतीने देण्यात आली आहे.